Sa ating pagbabasa, minsan ay may napapansin tayong mga salita na parang kakaiba ang ibig sabihin. Bigla kang hihinto at mapapaisip na lang bigla kung ano ba ang ibig sabihin ng kababasa mo lang na talata. Ang tawag sa mga kakaibang salita o pahayag na 'yan ay matatalinhagang salita.
 |
| Mga libro na kadalasang naglalaman ng mga matatalinhagang salita. (Image Credit: Unsplash) |
Sa ating wika, madalas tayong nakakabasa ng mga pahayag at kasabihang nagpapakita ng ating kultura at tradisyon. Marami sa mga ito ay naglalaman rin ng mga matatalinhagang salita.
Ang mga salita o pahayag na mga ito ay nagdadala sa atin kuryosidad. Minsan ang kanilang literal na kahulugan ay hindi pala ganoon ang gustong tumbukin ng mga salitang ito.
Upang mas mapalalim ang ating kaalaman, ating pag-uusapan ang sampu sa mga halimbawa ng idiomatikong pahayag na ginagamit sa pangaraw-araw na pakikipag-ugnayan. Ating aalamin kung ano ang ibig sabihin ng mga ito, at gagamitin din nating ang mga pahayag na ito sa pangungusap.
{tocify} $title={Table of Contents}
Mahahalagang Puntos
- Ang matalinhagang salita ay may iba pang ibig ipahiwatig bukod sa literal nitong kahulugan.
- Ginagamit ang mga matatalinhagang salita upang bigyang-diin ang iba't ibang konteksto.
- Madalas makabasa ng matatalinhagang salita sa ating panitikan kagaya ng mga tula.
Ano ang matatalinhagang salita?
Ang matatalinhagang salita ay mga salitang hindi literal ang kahulugan. Ang mga ito ay karaniwang ginagamit para bigyang-diin ang isang ideya o damdamin sa isang mas malikhain o mas epektibong paraan.
Mayroong iba't ibang mga uri ng matatalinhagang salita, at ilan sa mga ito ay ipinaliwanag sa susunod na seksyon.
Metapora o Metaphor
Ang metapora ay isang uri ng paghahambing kung saan inuugma ang isang bagay sa isa pang bagay na may magkaibang kahulugan.
Halimbawa: Ang buhay ay isang dula.
Simili o Simile
ang simili ay isang uri ng paghahambing kung saan madalas ginagamit ang mga salitang tulad ng o parang. Layunin nitong paghambingin ang dalawang magkaibang bagay.
Halimbawa: Kasing-tamis ng asukal ang mga ngiti ni Maria.
Personipikasyon o Personification
Ang personipikasyon ay tumutukoy sa pagbibigay ng mga katangiang pantao sa mga bagay o konseptong hindi tao.
Halimbawa: Humagulgol ang hangin.
Alegorya o Allegory
Ang alegorya ay isang kwento, tula, o larawan na may iba pang ibig sabihin sa literal nitong kahulugan.
Halimbawa: Ang Alegorya ng Yungib
Pagmamalabis o Hyperbole
Ang pagmamalabis ay ang sobrang paglalarawan sa isang bagay o sitwasyon.
Halimbawa: Ang labahan ni Aling Marites ay gabundok.
Pag-uyam o Irony
Ang pag-uyam, o sarcasm kung tawagin din sa Ingles, ay tumutukoy sa paggamit ng mga salita para ipahayag ang kabaligtaran ng literal na kahulugan.
Halimbawa: Nakakalungkot na masaya ang kanyang buhay.
Oksimoron o Oxymoron
Ang oksimoron ay ang pagsasama-sama ng mga magkakasalungat na salita upang mas maging matingkad ang pagpapahayag.
Halimbawa: Paroo't parito.
Mga Matatalinhagang Salita
- Sumakabilang Buhay - Ang pahayag na ito ay tumutukoy sa pagkamatay ng isang tao at iba pang bagay na may buhay.
- Walang Ilaw ang Mata - Ang pahayag na ito ay tumutukoy sa pagkawala ng pag-asa o kawalan ng sigla.
- Matalim ang Dila - Tumutukoy ito sa isang tao na mahilig pumuna at magbitaw ng masasakit na salita.
- Magdilang Anghel - Isang pahayag na ginagamit kapag may sinabing magandang bagay ang isang tao nang sa ganoon ay magkatotoo.
- Lumagay sa Tahimik - ang pahayag na ito ay ginagamit kung nagpakasal na ang matagal nang magkasintahan.
- Nagbibilang ng Poste - Ang pahayag na ito ay tumutukoy sa taong walang trabaho at nakatambay lamang.
- Butas ang Bulsa - Ang pahayag na ito ay tumutukoy sa pagiging kapos sa pera.
- Busilak ang Puso - Ang idyomang ito ay tumutukoy sa isang tao na may mabuting puso at kalooban.
- Di-makabasag Pinggan - Tumutukoy ito sa isang tao na mukhang mahinhin at inosente.
- Maamong Kordero - Ang pahayag na ito ay tumutukoy sa isang tao na mabait at mahinahon.
Halimbawa ng Mga Matatalinhagang Salita sa Pangungusap
- Matapos sumakabilang-buhay ang kanyang lolo, naiwanan sila ng maraming magagandang alaala.
- Tila walang ilaw ang mata ni Justin pagkatapos mawalan ng trabaho.
- Mag-ingat ka sa pakikipag-usap kay Aling Bebang dahil kilala siyang matalim ang dila.
- Tila nagdilang-angel ka dahil bigla ngang umulan pagkatapos mong banggitin na sana ay uulan naman ngayon.
- Nais na ni Rosmar na lumagay sa tahimik kasama ang kanyang mahal sa buhay na si Lowie.
- Simula ng mawalan siya ng trabaho, parang nagbibilang na lang siya ng poste araw-araw.
- Mahirap manghiram ng pera kay Marites ngayon, butas ang bulsa niya eh.
- Si Aling Anghelita ay kilala sa kanilang barangay dahil sa busilak niyang puso.
- Si Marisol ay di-makabasag-pinggan sa kanyang itsura pero matapang pala siya kapag katotohanan na ang pinag-uusapan.
- Si Ramon ay kilala sa pagiging maamong kordero dahil palaging kalmado kahit sa harap ng pagsubok.
Pangwakas
Sa ating patuloy na pagbabasa, nadadagdagan ang ating kaalaman tungkol sa iba't ibang salita at pahayag. Ang mga ito ay nagpapahiwatig na kayamanan ng wikang Filipino.
Sa kabuuan, ang pagkaunawa sa mga ito ay nagbibigay-daan atin upang maayos na maubawaan ang gustong ipahiwatig ng mga pangungusap na naglalaman ng matatalinhagang salita.
Nawa'y may natutunan ka sa ating talakayan ngayon. Maaari mo rin itong ibahagi pa sa iba para matuto rin sila ng mga bagong pahayag.