Isang Sanaysay Tungkol Sa Pasko
Tila lumalamig na naman. Isa itong senyales na malapit na ang pinaka-inaabangang Pasko. Bata man o matanda, ang pagdiriwang na ito ay talagang espesyal.
Ang Pasko ay isang taunang pagdiriwang na minamahal at inaasam-asam ng bawat Pilipino. Ito ay panahon ng pagmamahalan, pagbibigayan at pag-asa.
Ang sanaysay na ito ay magbibigay-linaw sa tunay na kahulugan at kahalagahan ng Pasko sa ating buhay.
Ang Pasko ay isang makulay at masiglang selebrasyon na ginaganap tuwing ika-25 ng Disyembre upang gunitain ang pagsilang ni Hesus. Isa itong panahon ng pagkakaisa, kasiyahan, at pagbabahagi ng biyaya.
Sa Pilipinas, ang pagdiriwang ng Pasko ay nagsisimula pa lamang sa ber months. Kaya sa tuwing sasapit ang buwan ng Septyembre, aba'y pinapatugtog na agad ang mga kanta ni Jose Mari Chan. Mayroon na ring Christmas lanterns at kung ano-ano pang bagay na makukulay.
Ang mga tahanan at komunidad ay nagliliwanag dahil sa makukulay na Christmas lights at dekorasyong nakasabit sa mga gusali at bahay.
Ang mga Awiting Pamasko, lalong lalo na ang legendary song ni Jose Mari Chan na Christmas in Our Hearts, ay naririnig sa bawat sulok, habang ang mga bata ay masayang nangangaroling.
Isa sa mga pangunahing tradisyon ng Pasko sa Pilipinas ay ang simbang gabi. May siyam na araw na misa na ginaganap sa madaling araw simula Disyembre 16.
Maraming mga Pilipino ang dumadalo sa simbang gabi bilang bahagi ng kanilang pananampalataya at paghahanda sa Pasko.
Ang diwa ng pagbibigayan ay laging kaakibat ng Pasko. Ang mga pamilya ay nagbibigay ng regalo sa isa't isa, at maraming organisasyon at indibidwal ang nagho-host ng mga charity events para sa mga nangangailangan.
Ang noche buena ay isa pang mahalagang bahagi ng pagdiriwang ng Pasko. Ang mga pamilya ay nagtitipon-tipon upang magsalu-salo ng mga hinandang pagkain bilang pagdiriwang ng Pasko. Marami man ito o maliit, basta't sama-samang nagdiwang ng Pasko, ay okay na.
Ang Pasko ay hindi lamang isang ordinaryong pagdiriwang, ngunit isang mahalagang kaganapan na nagbibigay-diwa at inspirasyon sa ating mga buhay. Ito ay nagpapakita ng ating pagmamahal at pagmamalasakit sa ating kapwa, at nagbibigay ng pag-asa sa gitna ng mga pagsubok.
Ang tunay na diwa ng Pasko ay makikita sa simpleng galak ng bawat pamilyang nagdiriwang, sa ngiti ng mga bata, at sa init ng pagtanggap ng bawat komunidad. Ang Pasko ay patuloy na magsisilbing simbolo ng pag-asa, pagmamahal, at pagkakaisa ng bawat Pilipino.
Sa pagdating ng Pasko, ating alalahanin at ipagdiwang ang tunay na kahulugan at diwa nito.
Ang Pasko ay hindi lamang tungkol sa makikislap na ilaw, masasarap na pagkain, o magagarang regalo. Ang tunay na essence ng Pasko ay ang pagmamahalan, pagbibigayan, at pag-asa na dala ng kapanganakan ni Hesus.
Sa bawat pagdiriwang ng Pasko, ating ipinapaabot ang ating pagmamahal at kagalakan hindi lamang sa ating mga pamilya, kundi pati rin sa ating buong mundo.
